Einleitung: Wie die Themenfindung geschah
Wahrlich, ich sage dir, heute wirst du mit mir im Paradies sein.
Dä Satz hei viu vo euch Konfirmandinne useghört, wo mir i dr Konfvorbereitig üses Thema usegsuecht hei. Das mit Hilf vonere biblische Gschicht, nämlech mitem letschte Teil vo dr Passionsgschicht vom Evangelist Lukas. Dr Lukas verzellt, wie dr Jesus uf Golgatha ads Chrüz gschlage wird u derby vom Volk u de römische Soldate verspottet wird. Am Schluss chunnts zum Gspräch zwüsche de beide Verbrächer und em Jesus, dene drüne wo sy chrüziget worde. Dr eint Verbrächer forderet Jesus uf, är als Messias söll mache, dass sie grettet wärdi vom Chrüz. Dr ander bittet:
Jesus, gedenke meiner, wenn du in dein Reich kommst!
Da druf antwortet Jesus mitem Zuespruch: Wahrlich, ich sage dir: heute wirst du mit mir im Paradies sein.
Paradies und die Bilder der Konfirmanden
1. Die Landschaft
Doch was isch das für nes Paradies, wo da drüber gredt wird? Ds griechische Wort Paradeisos bezeichnet ä Garte, e Park, wo viu Tier u Pflanze drin wachse. Im alte Orient hei sech das d’Chünige lah mache. Sie hei Gärte als Wild- und Jagdpärk aagleit. Paradeisos wird o für d’Bezeichnig vom Garten Eden bruucht, em Urbild vom Paradies am Aafang vo dr Bibel. Die Syte vom Paradies, die prächtigi Natur hei mir uf viune Bilder vorhär chönne bestuune: Bim Sunneuntergang mit ere zylete Schilfpflanze, wo d’Lucienne gwählt het oder ir Landschaft im Tessin vom Samuel, wo das Dörfli am Hang ganz vom grüene Wald umgäh füreglüslet. Das sy aber no nid alli Landschaftsbilder, wo mir vori gseh hei. Zum Grüen vo de Pflanze chunnt uf de meischte Bilder no ds Wasser derzue. O das chunnt im Garten Eden vor, äs git vier Paradiesflüss, wo usem Garte id Wält usefliesse. Die Kombination vo Pflanze u Wasser gseh mir dütlech bim Bärgbach vo dr Anna, em Wasserfall mit Rägeboge vo dr Sina u dr südfranzösische Landschaft vom Raphael, wo d’Piniewälder bis ads Meer fürechöme. Was isch’s äch, wo üs a settige Landschafte fasziniert, liebi Gmeind? Bi mir chunnt bim Aablick vo dene Landschafte es Gfüehl vo Rueh u Entspannig uf.
2. Die Gemeinschaft
Zum Paradies ghört aber nid nume e sogennant schöni Landschaft. Bi viune Bilder hei d’Konfirmande ergänzt, dass zum Paradies o Mönsche ghöre d’Fründe, d’Kolleginne oder d’Familie, süsch isch ds Glück nid vollkomme. Dä Beziehigsaspekt finde mir o im Garten Eden, däm erschte Paradies. Är isch nämlech dr Ort, wo Gmeinschaft entsteit. Dr Adam findet äs Gägenüber idr Eva. Die beide sy mit Gott per Du, Gott isch ihne dert unmittelbar Gägenüber.
Schön sy sie, die Vorstellige vom Paradies. Sy sie Tröim, wo für churzi Zyt, z.B. i de Ferie Realität wärde?
Burgdorf, das Paradies im Alltag entdecken
Dr Konrad füehrt üs mit sym Panoramabild vo Burdleff ufne neui Fährte. Ds Paradies isch nid wyt ewäg, sondern ganz nach. Zwar konzentriet sech o är uf d’Freizyt – aber we mir die vertroute Hügle u Hüser gseh, chöme mir u sicherlech ou öich, liebi Gmeind, nid nume paradiesischi Erläbnis i Sinn. Ds Bild vo Burdleff ermunteret üs, üsi Wünsch u Sehnsücht nachem Paradies z’übersetze i üses alltägleche Läbe. I persönlech möcht mitem Paradies nämlech o i mim Alltag öppis chönne aafah. Funktioniert äch das? Was het mi Alltag mitem Paradies z’tüe?
Das Paradies im Alltag: vier Aspekte, davon zwei neue
Was sy de d’Wünsch u Sehnsücht, wo ds Paradies uszeichne? Scho erwähnt hani d’Rueh u d’Gmeinschaft. Ds Paradies het aber no meh Syte. D’Aktivität u Konzentration bim Bewältige vonere Useforderig – o das hei mir gseh uf de Bilder: dr Ball, wo nachem Wurf dür d’Luft flügt im Bild vom Lukas, dr Uftritt vomne Blasmusikorchester bim Marco oder em Wälleritter vom Janis.
Die vier Aspekte auf dem Weg des Glaubens
Dadermit hei mir vier Aspäkte: D’Rueh u d’Gmeinschaft d’Konzentration u d’Aktivität. Sie begägne üs o ufem Wäg vom Gloube.
Gemeinschaft
Zersch zur Gmeinschaft, sie steit am Aafang. In Jesus Chrischtus isch Gott üs Mönsche ufne neui diräkti Art nach cho. Gott isch Mönsch worde, ds Geheimnis vo Wienachte. Jesus het verkündet, das ds Riich vo Gott chunnt. Drum het är d’Mönsche glehrt, wie sie nachem Wille vo Gott chöi handle. Ds höchste Gebot isch für ihn ds Doppelgebot vo dr Liebi gsi:
Du sollst den Herrn, deinen Gott, lieben mit ganzem Herzen und ganzer Seele, mit deiner ganzen Kraft und mit deinem ganzen Verstand und deinen Nächsten lieben wie dich selbst.
D’Liebi zu Gott chunnt ersch zum Ziel, wenn mir üs dene Mönsche zuewände, wo üs im Alltag begägne. D’Gmeinschaft mit Gott söll üs id Gmeinschaft mit üsne Mitmönsche füehre.
Konzentration und die darausfolgende Aktivität
I üsem Alltag mit sine vielfältige Ufgabe u Beschäftigunge ischs schwierig das Ziel immer vor Ouge z’ha. Drum bruuchts ufem Wäg vom Gloube o Konzentration. Mit Hilf vo Lieder u Gebät chöi mir üs bsinne uf das, wo üs im Läbe wichtig isch. Im Unser Vater finde mir d’Bitt um Vergäbig: und vergib uns unsere Schuld wie auch wir vergeben unsern Schuldigern. Wenn mir üs da dra erinnere u das probiere umz’setze cha nöii Gmeinschaft entstah. E Striit cha sech entschärfe, we dr eint e unerwartete Schritt ufe ander zuegeit.
Im Taizé-Lied, wo mir vori gsunge hei, isch e wyteri Aaregig drin, uf was mir üs sölle konzentriere: The kingdom of god is justice and peace and joy in the holy spirit. Ds Riich vo Got isch Grächtigkeit und Friede und Fröid im heilige Geischt.
Ds Lied geit no wyter mit dr Bitt: Come Lord and open in us, the gates of your kingdom. Chumm Herr u tue in üs d’Tor zu dim Riich uf. Mir bitte Gott, dass är üs die Offeheit schänkt, dass mir sensibel wärde für Herrschaft vo siner Liebi. Dä Ufruef chunnt o i nes paar Konfsprüch vor, wo mir bim Konfirmationsakt wärde ghöre. D’Momänte vo dr Konzentration hälfe üs, dass mir chöi aktiv wärde für ds Riich vo Gott, für meh Friede u Grächtigkeit a däm Ort, wo mir läbe. Das isch dr aktiv Teil vom Wäg vom Gloube.
Die Beruefig bekräftige u fiire mir i dere Konfirmation. Dir, liebi Konfirmandinne u Konfirmande syt beruefe zur Mitwürkig a däm Gottesriich.mit eurer Härzlechkeit u mit eurer Liebi.
Vom Segen oder der Kraft zur Ruhe (des Empfangens)
Daderzue wird euch dr Säge vo Gott zuegsproche i dr hütige Fiir. Dr Sääge isch Gottes Verspräche, dass är öich begleitet uf öiem Läbeswäg. Grad jetz, wo viu Nöis uf öich wartet. Gli scho wärdet dir amene nöie Arbeitsplatz stah oder i ne neui Schuel ga. Bi dene Useforderige syt dir aber nid uf euch sälber gstellt. Dr Sägenszuespruch söll öich bewahre, vor dr Überforderig alles sälber müesse zwägzbringe im Läbe. Vertrouet o druf das euch öppis zue-fallt. Für das bruuchts Zyte vor Entspannig, vo dr Rueh. So ne Momänt hei mir uf dr Foto vo dr Renée gseh. Dr Hund, wo ufem Stuehl d’Sunnestrahle gniesst. Är empfangt die wärmende Sunnestrahle amene süsch küehle Wintertag.
Dr Läbeswäg cha nach dr Konfirmation ganz verschiedeni Wändige näh. I zum Biispil bi vor zäh Jahr konfirmiert worde u ha am Gymnasium ds Thun aschliessend e Matur mitem Schwärpunkt Wirtschaft u Rächt gmacht. Das es einisch e Theolog oder gar e Pfarrer us mir würdi gä, hani bi minere Konfirmation no nid gwüsst. Dr Wäg vom Gloube het denn für mi bedütet, dass mis Läbe e Plan het, woni versueche z’entdecke. Da derby hälfe üs die vier Aspäkte vom Paradies, wo mir mit dr Hilf vo eune Bilder, liebi Konfirmandinne u Konfirmande, entdeckt hei: d’Gmeinschaft, d’Konzentration, d’Aktivität u d’Rueh.
Amen.
